Əziz Ziyarətçilər!

Biz -Azərbaycan Kardiologiya Cəmiyyəti İctimai Birliyi, tibbin kardiologiya sahəsində inkişafına təkan vermək naminə çalışan, yeni biliklərə və təcrübəyə dəyər verən bir təşkilat olaraq fəaliyyət göstəririk . Bizim əsas məqsədimiz, kardiologiya sahəsində fəaliyyət göstərən həkimlərə və tibb işçilərinə dəstək olmaq, onları ən son yeniliklərlə tanış etmək və bir araya gətirərək təcrübə paylaşımını təmin etməkdir. Bu məqsədlə, müxtəlif təlimlər, seminarlar və konfranslar təşkil edirik. 

Hədəflərimizə çatmaq yolunda planladığımız növbəti tədbirimizlə bağlı məlumatı sizinlə paylaşırıq. 

Belə ki, Avropa Preventiv Kardiologiya Asosiasiyası (APKA) (European Association of Preventive Cardiology (EAPC)) və Azərbaycan Kardiologiya Cəmiyyəti İctimai Birliyinin birgə təşkilatçılığı ilə 04-05 may 2024-cü il tarixlərində "Ürək-damar xəstəliklərinin profilaktikası və reabilitasiyası” üzrə kurs (“EAPC Cardiovascular Prevention and Rehabilitation Course") keçiriləcəkdir.

Kurs, kardioloqlar, ürək-damar xəstəliklərinin birincili və ikincili profilaktikası ilə məşqul olan həkimlər, ilk növbədə kardioloqlar, terapevtlər, həmçinin kardioreabilitasiya sahəsində fəaliyyət göstərən multidissiplinar komanda üzvləri: diabetoloq, nutrisioloq, reabilitoloqlar üçün nəzərdə tutulub. 

Təlim prosesi zamanı ürək-damar xəstəliklərinin birincili və ikincili profilaktikasının əsas müddəaları, piylənmə, tütünçəkmə, arterial hipertenziya, dislipidemiya, şəkərli diabet və s. bu kimi risk amillərinin idarə olunması, kardioreabilitasiyada fiziki aktivlik və qidalanma proqramlarının tərtibi üzrə ən yeni təlimatlar və yeniliklər işıqlandırılacaqdır. 

Odur ki, sizi Avropa və digər ölkələrdən olan kardioprofilaktika və reabilitasiya sahəsində tanınmış ekspertlərin, həmçinin yerli mütəxəssislərin qatılacağı kursun imkanlarından yararlanmağa dəvət edirik.

Hörmətlə,

T.ü.F.D, FESC, FSCAI

Ülvi Mirzoyev

Sədr